Sort by Post: ثورة السودان
View Single Post
Old 18-Jan-18, 15:11   #60
tikaina
Golden Member
 
tikaina's Avatar
 

Join Date: Jul 2004
Posts: 7,885
Default





كتب حمور زيادة روائي سوداني

الحاجة البديهية الفايتة على الجداد الالكتروني والباراهم انو *دور الاحزاب هو السعي للسلطة.*
اتهام اي حزب بانو داير السلطة دي حاجة كده *زي تتهم لاعب الكورة انو بيلعب عشان يجيب اقوان.* ما عيب عليك؟ مفروض تلعب عشان الرياضة!
معليش يا عزيزي .. *العمل الحزبي هدفه الوصول للسلطة.*
دي بديهية. ولا محتاج يعلموك من أ أسد و ج جدادة و ح حمار و م منتفع ...

البديهية التانية انو *الاحزاب بتتصارع على الوصول الى السلطة عبر الانتخابات في بيئة ديموقراطية.*
يعني مافي حاجة اسمها عاوزين تشيلو البشير عشان تجيبو الصادق؟
لأ عاوزين نشيل البشير عشان يبقى عندنا *حرية اعلام، وحرية تعبير، وحرية عمل سياسي، وجهاز دولة لا يسيطر عليو حزب واحد، وانتخابات نزيهة لا يديرها الحزب الحاكم باجهزتو الأمنية والقضاء غير المستقل بتاعو.*
لما نعمل ديل بنعمل انتخابات واوعك تدي صوتك للصادق المهدي او عرمان او اي زول مزعلك. شوف انت عاوز تنتخب منو وانتخبو. ولو ما فاز، اقعد حاسب الفايز عن فترة حكمو حساب الملكين. وبعد اربعة سنين رشح غيرو.
عارف لو كان عندنا ديموقراطية؟ كان على الاقل من 89 لهسه عملنا 7 انتخابات .. اقل شي كنا حنكون مرينا ب 4 رؤساء لو ما اكتر. كل 4 سنين تختار على كيفك. داير كحلي. داير كاروهات. و7 برلمانات. ده غير انتخابات الولايات او المحافظات حسب التقسيم الاداري. غير الانتخابات الداخلية بتاعة الحزب الانت معاو لو انت عاوز تتحزب. ولو ما عاوز تتحزب بتتفرج *ويكون من حقك تعرف كل حزب جواهو حاصل شنو واختارو منو يمسك ياتو لجنة.* ولو في حزب قال ليك لا دي شئون داخلية طوالي تفضحم ف الجرايد لانو ده بيخالف *قانون حرية المعلومات.* يعني تبرطع برطعة جد.

البديهية التالتة ما بتقدر تعمل فتنة بين الاحزاب. مش تجيب صور بيت الضيافة. لو قومت الناس الماتت في بيت الضيافة والجزيرة أبا عديل.
لسبب بسيط انو *الصراع بين الاحزاب زي ما علمتك فوق في البديهية التانية هو عبر الانتخابات في بيئة ديموقراطية.* فطول ما انو *ما في ديموقراطية وفي عدو مستبد واحد فكل الاتجاهات والتوجهات اختلافا ثانوي وما بيعني اي شي.*
بعد يسقطو رئيسك وحزبو الحاكم يجو قدام بعض في الانتخابات يفتو كلّو.
وطبعاً لأنك غالباً صغير ولو ما صغير فأكيد طبعا وعيك في مستوى وزير ولائي فانت طبعا ما عارف انو الاحزاب برضو سبق اتوحدت ضد نميري ما قبل 1976 وبعد 1983. وشالوهو بره واتعملت فترة انتقالية واتعملت انتخابات. والكانو شغالين مع بعض ضد نميري من الاحزاب المختلفة نزلو انتخابات ضد بعض عادي جدا.
وعلى فكرة ده كان بعد بيت الضيافة برضو وبعد الجزيرة ابا.
يعني انت بتحاول تعمل فتنة *سبق للاحزاب دي انها اتجاوزتا واشتغلت سوا واسقطت دكتاتور* ورجعو للانتخابات ضد بعض عادي.

البديهية الرابعة انو ما تاني يوم لمشي البشير وعصابتو حتتعمل انتخابات. احنا زي اي زول عيان عيا موت وربنا كتب ليو عمر محتاجين فترة نقاهة طويلة. فترة ما اقل من 3 سنين بيسموها *الفترة الانتقالية.* عشان نخلص من عفن *التمكين وسيطرة الحزب الواحد على مفاصل الدولة ومليشياته المسلحة والديون والفلس وانقطاع العلاقات مع العالم*. محتاجين نقعد نبنيها تقريبا من الصفر عشان نوصلا مرحلة الانتخابات.
الفترة دي ما بيحكمك برضو الصادق ولا الحزب الشيوعي. بيحكمك تحالف واسع من كل التيارات السياسية *وحكومة تكنوقراط يعني خبراء غير سياسيين*. يعني ما حيدو فلان وزارة المالية عشان اتحادي ديموقراطي ولا داك وزارة الزراعة عشان بعثي. ده بيحصل بعدين لما تتعمل انتخابات وحزب يفوز بتشكيل الحكومة.

الحاجات دي بديهيات اي طفل عارفا. لكن انت طبعا مكنكش في بابا عمر الجا بانقلاب بالدبابة غالبا وقتها انت زاتو ما كنت خشيت المدرسة وعاوز تقعد تقول لينا ما داير الصادق لأ لأ ما داير الصادق. يا زول عنك ما درت الصادق. امشي ادي صوتك لود عمتك في الانتخابات زول ماسكك مافي.

شنو؟ العاوز يشيلا من البشير يخش انتخابات؟ اولا ده ما خيارك. ده خيار الناس الواطين الجمرة وبيدفعو تمن مواقفم. اها الناس ديل يشيلوها من الحرامي ده بالانتخابات وله يشيلوها بالمظاهرات وله ينشلوها منو وهو خاشي يعزي في بيت بكا، دي خياراتم.
تاني شي هو انت كنت اخترت البشير لما تجي تفرض على الناس تشيلو كيف؟ انت مش صحيت لقيتو جا بالدبابة؟ بكره تصحى تلقاهم قلعوها منو بالثورة.

يلا اتفضل .. امشي اصرف يوميتك والحق صف العيش .. يا....

منقول

__________________


To view links or images in signatures your post count must be 10 or greater. You currently have 0 posts.

tikaina is offline               Reply With Quote