Just you and Me [Archive] - Sudan.Net Discussion Board

Computergy

30-May-09, 06:44

اهذا الصباح قررت ان اقوم بحملة نظافه,, فقد تكدست المهملات عندى خلال كل الاسبوع الماضى,,, و بصراحه كدا ريحتها حا تضرب بعد دا,,,,, فقلتا,,
يا ولد,,, قوم نضف بدل ما الحكايه تخرب
و بكره الناس تشيل حسك
يقولو
وسخان
طبعا البيسمع الكلام بيديهو شويه زياده و يوصلوا لى قدام مبهر
كمبيوترجى دا وسخان و رمدان
وطبعا الحكايه تمشى و تزيد
وشى بشتان
لمن تصل سكران
يلا الخبر يصل بيتنا و ابوى يقوم يطلق امى و يشرد العيال
فا
قلتا بدل ما اخلى الامور تصل لحدى المستوى دا
احسن اقوم انضف
بعدين الموضوع ما عايز ليهو حفله
كلها ماوس و رايت كليك
انا بتكلم عن سله المهملات يا وهم
الريسايكل بين الفى الدسك توب
يلا
قمتا مررتا الماوس عليها و بدل ما اكب الزباله
فتحتا الكيس
اها يلا لقيت ليك اوراق كتييييره
شى معفصه
وشى مدردمه
وشى مكرفسه
وشى كيف كيف كدا
المهم شلتهن كلهن و كومتهن قدامى
اتفرجختا فى الواطا و قعدتا اقرا,,,
فا قلتا
اقرا ليكم مقتطفات من الورق الرميتو
رايكم شنو؟
بالمناسبه انا خطاط والله بس ما عارف فى الورق دا خطى منيل كده ليهhttp://www.youtube.com/watch/v/c8YA1yXPMK4

Computergy

30-May-09, 06:45

الورقه الاولى

قارورتى يا بقرتى

اخذت اتلفت حولى,, كانو كلهم مثلنا,,
صاله لا تزيد كثيرا عن العشرون قدما مربعا,,, تشبه المينى لوبى كدا,,,,
تفصلنا من ذاك الاقرع و زوجته التى تشبه الفخمه طاوله زجاجه انيقه بها عدد من المجلات ,, لفت انتباهى عدد الفين و تسعه من مجلد شركة ايكيا للاثاث,,
على الطرف الايمن من الطاوله,, على بعد خطوتين تلتصق الاريكه الخضراء بالحايط,, رجل هندى الملامح و معه امرأه تشبهه لونا و سحنه.
كانت هى على يمينى,, كنا قد شبكنا ازرعنا, بينما تركت تلك الحقيبه النسائيه الكبيره تتدلى على كتفها الايمن,, كان بطنها كبير,, كبير جدا,,يتعرق جبينها باستمرار و تتنفس بصعوبه,, فقد شربت الكثير من الماء,, لابد من انها تحتاج دورة المياه الآن.
وجهها اصبح مستديرا و انتفخ خديها,, عيناها حلوتان,, حالمتان,,ترى فيهما حياة و حياء,, كانت تزداد انتفاخا و استدارة يوم بعد يوم حتى ظننت انها ستنفجر.
اخذت تقلب حقيبتها و تتململ بتعب بالغ,,,
خد حبيبى امسح جزمتك فيها غبار,, معليش ما حا اقدر ادنقر امسحا ليك,,
اخذت المنديل و انا افكر,,, ما اروعهن,, حتى وهى فى هذا الحال تفكر فى مظهرى,,
انحنيت قليلا لانظف الحذاء,,, بينما اخذت هى تجر ياقة قميصى,,,

Computergy

30-May-09, 06:46

الورقه التانيه

سحر و كنز

بعد صلاة المغرب يحلو لنا ان نجتمع على شاى المغرب,,,,فى الصالون كان الجو هادىء,, لم يأتى فريق المجانين بعد.
امى غيرت الاثاث تانى,,,رغم انو زوقى متأثر بالبساطه الاوروبيه فى الاثاث الا ان فخامة الاثاث الذى تختاره امى يعجبنى كثير,,,يجعلك تحث انك فى قصر,هيى انا قصدى تحس,,
الكنبات ذات الاكتاف الضخمه, فوط بيضاء جميله تزينها ,الكراسى المريحه الواسعه,,مرصوصه بشكل جميل,,,اهو داك الكابتن كعادته قاعد خالف رجلو وماسك ليهو كتاب بالفرنسى,,,منظرو جد حلو و هو قاعد خالف رجولو كدا,,خاصه مع الكدوس الفى الطربيزه جمبو,,حاجه كدا زى الارستقراطين دولك,,
تعرف يا كبتن,, بيعجبنى فيك الجو الاقطعى العايش فيهو دا,,,
ظل كما هو محدقا فى كتابه دون ان يحرك ساكنا,,,حتى خلت انه لم يسمعنى,,, بعد برهه رفع رأسه و عدل النظاره بثلاث اصابع ثم نظر الى مليا,,,
انت جيت يا صايع؟!!!
كيف الاحوال يا كبتن؟ والله الشوغ بحر
كابتن يا ضايع مش كبتن,,, شايفنى لابس شورت و بضقل؟؟ّّ اسمع اتصل بى الاولاد ديل شوفم اتأخرو مالم!!
دخلت امى و كانت تحمل صينية الشاى,, كانت الصحون مرصوصه فوق بعض عشان تدى مساحه و الكبابى جمب ابريق الشاى و جمبهم جك حليب صغير كدا لونو ابيض,, طقم الشاى الذى احضرته لها من ايطاليا,,,مكتوب فيهو صناعة ايطاليا لكن هى لسا مصره تسميهو طقم الصينى,, اموت و افهم الناس دى بتفكر كيف!!!!
اسرعت لاساعدها,, اقتربت و انحنيت مقبلا جبينها
عنك يما,,,اخبارك يا جميل؟؟!!!

Computergy

30-May-09, 06:48

الورقه التالته

عم مختار
تعرفو,,,
الاسبوع الفات قررتا ابقى زول جديد,,,غيرتا كل حاجه,,,اول شى قللتا التدخين,, بعدين عملتا نظريه تفاحه فى اليوم,, رغم انى بكره التفاح موت بس لازم التغيير,, و بعدين قبل ما انسى,, مشيت موول الامارات و ختيت لى سبعمية درهم فى سيديات موسيقى,,,يعنى كدا كل الامور تمام التمام و ممكن نبدأ مشروع كمبيوترجى جديد,,بجد ما عندى زمن كافى,, لكن من هنا لى يوليو انا لازم اخد لى بيت,,, ان شاء الله امشى اشوفو,, اصلو الاسعار وقعت الايامات دى,, و ممكن الواحد ياخد ليهو بيت عجيب,, الموست بى بلاش,,عشان البيت يعجبنى و يرضى بى لازم اكون انسان جديد,,, اى و الله,,,
انا بهدرب بقول فى شنو؟
آى صاح كتا بتكلم عن التفاح,,,
اها شفتوا قصتى مع التفاح دى بدت من طن كدا

Computergy

30-May-09, 06:49

الورقه الرابعه

حليب طازج

كان متوسط الطول,, واضح الملامح,, تبدو عليه ملامح القوه ,,الا انه لم يتحمل قبضه يدى عندما صافحته,, يبدو اننى كنت اريد ان اذيقه طعم الند,, فعصرت بما اتيت من قوه,, كانت نفسى تحدثنى فقد,, اعجبنى شكله كثيرا,,, سمحت لنفسى ان احملق فيه,
,تمعنت كل تفاصيله,, فانا مغرما بشكل الرجوله,, احب ان ارى القوة فى وجوه الرجال,,, احب ان ارى العنفوان يسكن اجسادهم,, لطالما كان الانف و الجبين مسحة لا يمكن ان اخطئها,,,تعجبنى خطوط الباس مثل هذه,,,
او ربما هى علامات تنبى برضى الايام,, ربما,, لكنها حتما تروق له ايضا,,
كنت انتظر اللحظه التى ستوقفنى امام المرآه,,, هل ابدو مثله؟ لقد نسيت كيف ابدو.

Computergy

30-May-09, 06:50

الورقه الخامسه

خضراء الدمن

سكبت قليلا منه,,,
صمتت فسكن كل شىء
مازالت تريد المزيد
كأنها كانت متردده,,,هل يكفى الى هذا الحد؟ ام انها تريد المزيد!!!!
كلما رشفت منه,,,
تزداد جمالا
تغوص عيناها ,,,
تثقل جفونها
تطول اهدابها,,,
فتتركنى صريعا,,,

Computergy

30-May-09, 06:51

الورقه السادسه

فلسفة حياه

يا جماعه,,,
اول حاجه قبل ما نبدأ ,,
اتخيلو معاى
انو انا مندسى ورا حيطه
اى حيطه
عايز اقول كلام كتير
بس خجلان
اى والله
يلا
الاسبوع الفات دا كلوا انا مرزوع فى البيت,,, زى شوال العلف,,,زهجان و الدنيا مخرمجه معاى الف,,
و بصراحه عايز لى زول اتفصم فيهو,,,
كتا بفتش لى ناس شلة الانس
ناس ابو هناى
ومغفل ارض البتاعين
و زى ويمن
معليش يا جماعه انا زول صريح شويه
و بعدين ما تنسو انى ورا حيطه
انا مش قتا ليكم مدسى ورا الحيطه

Computergy

30-May-09, 06:52

الورقه السابعه

كم نحن جميلين!!!,,,

كانت تسند رأسها على الكرسى برفق,,, شاخصا بصرها,,, حالمة يغظه,,
احبهم اشداء,,,
احب ان ارى اقتران الحاجب ,,هنا
احب ان ارى عروقهم منتفخه,, اذرعهم هكذا,, منتفخه,, عريضه,,
احب ان ارى اصحاب اللحى,,,, احس انها تجعلهم اكثر فحوله,,,
كفى عزيزتى فما عدت اتحمل,,,
مالت برأسها جانبا,,,
بادلتنى النظرات بطرف اعين
ابتسمت بخبث
ثم عادت كما كانت
ثمله,,,
انت صديقى,, ارجوك ان لا تنسى ذلك!!!!!
اذا؟!!!
لا شىء,,, يبقى الوضع على ماهو عليه,,,,
اللعنه,,, انا امامها بكل ما بى ولى,,, وهى تتغزل به,,, اى حظ عاثر هذا
عاد الصمت مرة اخرى,,,
اخذت

Computergy

30-May-09, 06:53

الورقه التامنه

استغفر الله

معليش يابا بس والله ما قدرتا اتحملو,,,بجد آسف لكن و الله لو ما كتا معاى انا كان,,,
اسكت,,,اسكت
كان شنو يعنى,,,حا تشاكلو و تقعدو تتصارعو زى التيران؟ دا ياهو الدفعنا دم قلبنا فيهو؟
احب ان اراه غاضبا,, فهو نادرا ما يغضب,,,حسنا حسنا,, هو يغضب بعد مشاهده نشره الاخبار,, لكن ان يغضب بسببى!!! لا لا,, هذا نادر الحدوث,,ثم,,اه,, ثم اننى املك ناصيته بلحظه لو اردت,,, فقط ابتسم و اقبل جبينه فيحتال ذاك البركان الى جبل من الايس كريم,,, هههه,, ايس كريم فانيليا
بتبرطم بتقول فى شنو؟
لا مافى حاجه يابا,,
طيب شوف قدامك و انتا سايق
اها ,,حاضر
شوف يا ابنى,,, قالو كان فى بت قاعده فى باص و جمبها طوالى راجل كبير فى السن,, البت كانت محجبه و الراجل كبير,, المهم الراجل كان كل شويه بيتلفت و لما يعاين ليها بيغمز ليها بى عيونو,,
قامت البت ضربتو كف و قالت ليهو استحى على عمرك
الراجل سكت شويه و بعدين قال ليها يا بتى انا آسف يا بتى لو غلطا عليك
لكن انا اعمى و عيونى بتفتح و تقفل براها,,

Computergy

30-May-09, 06:54

الورقه التاسعه

مغامرات

اب لمه ازيك يا فرده,,
اوووو الظربان ,,, اخبارك يا راجل
همس الدبيب فى اذنى,,,
اقسم بالله الظربان دا صعب,,, يا مان التقول ما بياكل معانا نفس الاكل,,ياخ انا يومتا خشيت وراهو الحمام كتا حا اغمر,, ياخ اقول ليك مبالغه,,
كنت اكاد اتمرغ بالارض من شدة الضحك,, كان يتحدث وكل وجهه تعابير
ياخ ما تضحك,,, و الله العظيم يومتا فكا ليهو حاجه كدا,,,,يا مآآآآآآن وحات الله هو زاتو لما طلع من الحمام طلع دايخ
كان بيتكل بى الحيطه,, اقسم بالله العظيم ياخ كان ما مصدقنى اسأل دوشمان,,

umdursalam2

30-May-09, 07:45

http://jr7ad.com/gallery//image.php?imageid=5452

حدثني أحد أعمامي ذاك المساء؛..فقال؛

في ريعان الشباب كانوا...والطريق أنيق مخضر.....

والهواء بين نسيم وريح خفيف يحمل نكهه الأبيض المتوسط الجميل...

.والشاطئي بجانبهم...مسالم ...مسالم.....خطواتهم ترقص طربا على نجم الزمن الجميل...والحديث حنين ودعابه...عن السودان والخرطوم ورمال الأبيض...و شوق الرجوع والشكوى من جفاف الدرس وتعب الذهن....
هذه الرحله ...في هذه الجزيره اليونانيه المنعزله... تعطيهم بعض الراحه...و تمد حبال الصبر....فجدة يعودون للمدينه الأم...ويعاود شوقهم الى بلادهم....

امتد الطريق وسأل سائل منهم...:

يا خواننا نحن رحنا الظاهر....ود عبد الكريم...أنت أصلك زول شليق...تلقاك حسي الفندق ده ذاتو ما عارف مكانو.تشوبر ساي بس...!!!

- ياخ عارفو بس شيل الصبر...يا سيد الشكوى...غلطانين نحنا الجبناك معانا...رحله شنو ياخ أنت زاتو البسوقوك ليها.....؟.أول وأخر مره ...
قلنا ليك الدرب عارفنو...نوعك ده يمشي رحله لي جزيره توتي با البنطون بس....أكتر من كده ما يستاهل...

وتعالت ضحكاتهم....وهم يمشون في مرح...

وعلى البعد... بيت أنيق...وحديقه...مرتبه...ورجل على طرف الحديقه...يجلس على كرسي أبيض وفي يده كوب...يرتشف منه...
ويمد قدميه...الحافيتين..في كسل...كأنه عرضهما على البحر أمامه استخفافا به......وكل جسده...في امتصاص لاشعه شمس الضحى اللطيفه......علها تعيد اليه بعض الشباب...

umdursalam2

30-May-09, 07:47

http://jr7ad.com/gallery//image.php?imageid=5452

نعم....أشتعل رأسه شيبا...وبلغ من الكبر عتيا...وأسمر جلده الأبيض وتجعد...
..هذا ما تبينته ثلة الأصدقاء اللاهين...وهي تقترب منه...لتسأل..
عن المكان الذي يقصدون....
اقتربوا منه...وأزدادو صخبا ....وضحكاتهم تعلوا...فقال قائل منهم...؛
أسأل عمك دا ياخي بيكون هو المخطط الحله دي...
ضحكوا جميعا و صارو...على بعد عشره..أمتار...فحياه احدهم...با اليونانيه والأخر مداعبا...با العربيه..؛
.حاج موسى كيف أصبحت...!

ضحك البقيه..ضحكات مكتومه...ووقفوا ينتظرون الرد....

اعتدل الخواجه العجوز في جلسته...هم با الحديث....ولكن...

كأن شيء هزمه فجأه....
أطرق...
نظر اليهم...
أطرق مره أخرى وأشاح بوجهه .
..ثم..
.ثم اهتز جسده بعنف..وشرع في بكاء...مر..
.نشيج...سرعان ما صار نحيبا..
.وما أدراك ما بكاء الشيوخ...

تسمر الجميع لدقيقتين وتوقف الهواء وسكن البحر واجتمعت الدنيا في الجسد المهتز بكاء...
انتبه احدهم ...فوضع يده على كتفه النحيل....وخاطبه مسريا عنه باليونانيه.....أن هون عليك...
أمسك ....العجوز بيده...وانتصب ونظر اليهم جميعا ...ثم تلاها بأخرى تفحص كل واحد منهم...
وفي جد قال.؛

بدارجيه سودانيه طلقه؛

كده..!!!!!..كدا علموكم اهلكم تعاملو الناس الكبار..؟
.مسخره وقله أدب والله..!!!!
.لازم تفهموا لما تكونوا بره السودان انو انتو عباره عن أعلام....زي العلم الرفعوهو الازهري والمحجوب...عمري اللحظه ديك ما بنساها

..أيوا مابلدي....لكن أهلها بقوا أهلي...رغما عني...با المحبه...والمحنه...والأدب....والعشره ألما بتتنسي....

أسقط في يد الجميع...

انهار صاحب أخر دعابه منهم ..وجلس على الارض...وبكى...

قال الشيخ اليوناني؛ خلوه؛ وجلس...

وجلسوا هم على العشب في صمت...متحلقين حوله...وفتح حديث الذكريات....عرفهم جميعا...ومن لم يحكي له عن أهله وأبيه وجده...حدثه عن الحي الذي يقطن فيه وساكنيه....
مرت ساعتين وهم صمت ينصتون...
أقامو تلك الليله عنده بعد أن حسم أمرهم ب ؛
علي الطلاق بره بيتي ده ما تبيتوا...

ورجعوا صباحا الى المدينه الكبيره....
.و كلمات الرجل تدفعهم دفعا نحو الرجوع الى وطن.....على أرضه ما يستحق الحياه......

Computergy

30-May-09, 15:04

شلولو

30-May-09, 15:37

بوست انيق
كميوترجي وامدرسلام
متعكما الله بالصحة والعافية

حضور ومتابعة شيقة

Lina

30-May-09, 15:39

كل ورقة فيها رسالة

واصل يا كمبيوترجى نحن متابعين قصصك المدهشة السهلة الممتنعة دى

:):):)

أمدرسلام

اضافتك رائعة برضو

و اسلوبك فى الكتابة جميل

:):):)

dollyh

31-May-09, 04:58

umdursalam2

01-Jun-09, 10:08

أخي الشقيق كمبيوترجي...
.نعم سأجعل من هذا البوست...مساحه لما نشترك فيه من الأفكار...و...حوش.. لتحمل بعضنا لبعض والأستماع للاخرين ....وأحاديثنا عن ما يلاقينا في دروب الحياه....

اذا...سأضيف هنا حتى قصصي وقصائدي التي مزقت أوراقها و طويتها.....

.اذ أن حتى أحاديثنا عن ما نحسبه فشلا....يمكن أن تكون دروب نجاح جديده....لنا وللاخرين...اذا حكيناها وقلناها بصدق...وتصالح مع النفس...

umdursalam2

01-Jun-09, 10:17

http://jr7ad.com/gallery//image.php?imageid=5774

انشوده الشاطيء...

طارق...على شاطيء ألود المبين

لم يعد يخشى مدامات المراره

أدمن الحزن تحد وعنادا وجساره

قلب مجذوب يطوف من بيت لحاره

بث أن مر جميلا حتى للذر أعتذاره

ينشد الود المدون في قلب المحاره

ويرى في جبين الخيل فألا واشاره

ألا أنه لم يحرق كعادته السفين

هو موءمن هيهات يلدغ مرتين

سيمد راحته نداء مجدليا و يقين

ويمني الروح بعض نفح الياسمين

ويذوب الأيام في الصبر الجميل بلا أنين

يستجلب الصبح دعاء سرمديا و حنين..

أن كان للقيا بسهم الغيب أمر..ستكون..

فهو لن يرجو سوى الرحمن في أمر معين

أن شاء للناس اجتماعا رد كيدا و فتونا وظنون

ما خاب من ناجاك ربي بفلاة كان أو في بطن نون...

umdursalam2

01-Jun-09, 10:46

http://oracleguy.***********/SUNS.JPG

بشكوسا...

أنا يا بيضاء شط الحب والود القديم
أنا صهوه الأشعار عصفا و رعودا و نسيم
قامتي وحشيه قدت من ألليل البهيم
نهر تحدر للسهول مضمخا جدب التخوم
يبعثر الالحان سقيا للصديق وللغريم

أنا بركل الأمال لحن الأستواء
أناصحوة الأجيال ترنو للسماء
أنا أرفع الانجم في هام المساء
أنا رشفه المعشوق حد الارتواء
أنا من صهيل الليل ترتيل رجاء
يبتغي الأخري ويلحف في النداء
ينشد العفو اوابا لدى رب كريم...

حاشيه؛ بشكوسا في لغه النوبيين...ايماه بالشفاه دليل الترفع والتعالي